الشاعر/رمضان عبدالله احمد...يكتب ..راح الحنان ...

راح الحنان
خلاص داخلين على سنه
من يوم فراقك ياامي
راحت ساعات الهنا
مفضلش  غير همى

من يوم فراقك ياغاليه
الدنيا صغرت قدامي
من بعدك قلوبنا خاليه
حتى اخوالى واعمامى

طمنيني عليكي يامه
واطمني انتي كمان
لسه دفيان م الضمه
حنانك صعب النسيان

والله أنا فاكر كلامك
وفاكر نظرة عنيكي
مش ناسي ابدا سلامك
والرحمه المخلوقه ليكى

روحتي وراح الحنان
وتوهنا بعدك ياامي
مش لاقى بعدك امان
كنتى لجراحنا بتلمي

من يوم ياامى ماسبتينا
محدش طبطب علينا
محدش ضمنا لحضنه
وحضنه مش  هيدفينا

دعواتك ياامي ليا
في الدنيا ديما حفظانى
ف الصبح وف المغربيه
 بركة دعاكي محوطانى

بيقولوا النهاردة عيدك
لا والله غلطانين
والغلط فوقينا وتحتينا
يانبع الحنين

مش انتي اللي عيدك يوم
عيدك ياامي طول السنين

تعبنا بعدك ياامي
واتحرمنا من دعاكي
فاكرين دايما كلامك
من لما كنا صغيرين
         -----------
بقلمي / رمضان عبدالله أحمد