( لفى بيا يا دنيا لفى ) :
لفى بيا يا دنيا لفى
دوخينى رغم انفى
عمري ما شفت فيكي راحة
ايوه عايش بس منفى
لفى بيا ودورى دورى
اقلعيني من جذوري
خدت عهد اصبر عليكى
بس امتى حييجى دورى ؟
جوري عليا يا دنيا جوري
اقطفي وردي وزهورى
بس مش على طول تشدي
هدى مرة ومرة ثورى
لفي بيا وشحططيني
بهدليني ومرمطيني
لو عذاب الكون ده كله
مش حسيب ارضي وطيني
خفى عليه يا دنيا خفى
ليه بعقلى بتستخفى ؟
ولا عشان ما انا دم ولحم ؟
بتقطعي فيا وبتشفى
لفى روحي لحد غيرى
حلي عني اخدتي خيري
ارحمى دمعى ف عينيه
ولا حيبقى ده مصيرى ؟
لفى بيا يا دنيا لفى
دوخينى رغم انفى
عمري ما شفت فيكي راحه
ايوه عايش بس منفى
بقلمي الشاعر جمال زكي عينر
ليست هناك تعليقات:
إرسال تعليق