هحكى عنه ...بقلم.. الاستاذ.. النميري نافع

السلام عليكم ورحمة الله وبركاته..
    .... هحكي عنه ....
إهداء إلى روح والدي
رحمة الله عليه.

هحكي عنه..
لما فكرت احكي عنه..
عينى غرقت بالدموع..
وقلت إنه...
في حد برضو ينسى..
حته منه..
فقلت احكيلكوا عنه..

هحكي عن قلبه الحنين..
واللي عمره ما زعل حد منه...
هحكي عن رقصه بالعصايا وفنه..

هحكي عن عيونه..
واللي على طول بتضحك..
ولا خفة دمه...
هحكي عن أطيب قلب شفته...
وخلاص راح..
ومفيش تاني منه..

هحكي عن رنة صوته..
لما كان ينده باسمي...
والله لسه ف ودني...
كنت فاهمه وكان فاهمني..
من غير ما انطق بكلمه..

لما فكرت احكي عنه...
مر قطر سنين حياتي..
قدام عنيا..
سنه سنه..
كان قلبه جنه..
كان بيقطر محنه..
عمره ما كان قاسي..
ع اللي منه..

هحكي عن قلب صاحبي...
          قلب قلبي..
           كان يقولي...
هعملك كوباية شاي معايا..
انت النهارده صاحي بدري...
تشرب احلى كوباية شاي...
             بس مغلي..
المخ يصحى والعين تفنجل..
بس عيبه...
كانوا شوية حرقان في صدري..
                كان هو صاحبي...

هحكي عن قلب..
عمره ما خذلني..
كان على طول..
بيحكي عني..
كان ساندني..
كانت كل طلباتي مجابه...
كنت اكتر واحد مدلعني..
             كان قلب قلبي..

هحكي عن قلب أخضر..
ناس كتير قسيت عليه...
وبرغم ذلك كان بيعذر...
كان بينسي بسرعه...
كان بيغفر...
      كان بيرجع زي الاول واكتر...
           ما هو قلب أخضر..

هحكي عن قلب..
عمره ما خاف..
قلب أسد..
بس كان شفاف..
سنين عمري معاه كانت شبع...
وعمري ما شفت سنين عجاف..
                 كان شفاف..

هحكي عن قلب..
بشوف خوفه وقلقه...
لما اكون تعبان..
هحكي عن شيلتي على كتافه...
لما اكون عيان..
هحكي عن سهره..
لما اكون بذاكر وأما اكون قلقان..
                هحكي ع الإنسان..

هحكي ع القلب...
واللي نفسي اخده ف حضني..
وابوس ايده واقوله..
مش كفايه..
كلامنا في الأحلام..
         هحكي ع الأيام..

هحكي عن قلب..
كان مؤمن بحلمي.
كان ف ضهري..
قاللي احلم.. واوعي تندم..
انا معاك للنهايه..
بدعي ربي كل يوم أن انت توصل...
                       بس احلم...

هحكي عن قلب..
ربا وعافر..
لحد ما كبر وعلم أطفال صغار..
هحكي ع اللي أدى الرسالة..
واللي كان رأسماله..
إيمان بربه وحب خلقه..
وشوية عزيمه مع إصرار..

هحكي ع الغالي ابويا..
لأنه وحشني خالص..
والله وحشني خالص...
                     وحشتني ضحكاته..
واللي كانت ماليا علينا الدار...

هحكي عن قلب..
كله حب...
كان نفسي اكون معاه قبل اما يمشي..
كان نفسي يشيل ابني وبنتي..
       كان هو داري..
            كان كل جيشي..
             كان مدينتي..
كان نفسي اكون معاه قبل اما يمشي..

هحكي عن قلب..
          اما سبني...
           الخوف غلبني...
بس سابلي..
ميراث كبير...
قوي قلبي..
سابلي حب الناس..
احسن من كنوز الدنيا..
وسابلي..
                ستر ربي....

                  ... تحياتي
                                   النميرى نافع