الشاعر/ جمال زكى عينر ...يكتب ...سبتينى ليه يامه ...

مر على رحيلك ستة عشرة عاما يا امي ، رحمك الله وأسكنك فسيح جناته .

( سبتيني ليه يامه ) :

سبتينى ليه يامه
الدنيا من بعدك ضلمه
سبتينى ليه يامه
لا عزوه بعدك ولا لمه

يا أمى بعد ما سبتينى
وبقيت لوحدى وفتينى
ما ارتاح لى بال والله يامه
واتفرقت كل اللمه
سبتينى ليه يامه
الدنيا من بعدك ضلمه

ماعادش اهل ماعادش احباب
من بعدك يامه بقينا اغراب
كل اللى جمعتيه يامه
عاش دنيته وتاه فى الزحمه
سبتينى ليه يامه
الدنيا من بعدك ضلمه

فاكره اما كنتى تضمينى
تقوليلي يا ابني يا نورعيني
وجوه حضنك تاخدينى
لا حضن بعدك ولا ضمه
سبتينى ليه يامه
الدنيا من بعدك ضلمه

كات الحياه وياكي براح
ايام فرح وليالي ملاح
بعد المسا كان احلى صباح
وكنتي في العشرة مسالمه
سبتيني ليه يامه
الدنيا من بعدك ضلمه

يا حبيبتى يامه وحشتينى
من يوم ما رحتي وسبتيني
الفرح غايب عن عينى
لا خاله حتى ولا عمه
سبتيني ليه يامه
الدنيا من بعدك ضلمه

تعبتي يامه عشاني كتير
وشلتي همي يا امي كتير
من مصغري او كنت كبير
اسكنها ياربى الجنه
سبتينى ليه يامه
الدنيا من بعدك ضلمه

       بقلمى الشاعر/ جمال زكى عينر