الي فات مات .... بقلم الشاعر الراقي الدويدة عبد الرزاق

هذه القصيدة بعنوان الدنيا وهي بالعامية المغربية
اللي فات مات حسبو دار عمامة
لا تلوم النفس عليه وإياك الندامة
العجب كيفاش بنادم يشوف وراه
وقدامو يتعامى.
نوصيك ديرها في يد مولاها
ورحمتو ديما ترجاها
رجاك فالله لا تحاول تقطعو
قطيع الرجا فالله معدود سفاهة
شفت الدنيا مثل سحابة
اللي يگول ظلها يدوم كذابة
الغشيم عاض بسنانو. .
والفطين دار ليها شطابة
الدنيا شتا وربيع وصيف وخريف
شي عشقها شي شتف عليها شتيف
واحد قانع باش ما عطى الله.
وواحد شبع وبارك على الخطيف
سير بها كيف ما بيك سارت
سير نيشان ودور معاها إلى دارت
وإلى بيبانها عليك تسدات
ما تخافش عند الله الكريم السوارت
عاشر مولاك وزين العشرة.
بعشرتو من جرحك تبرا
هاذ الكلام فيه ماذا معاني
حديثي مع ساداتي العقالة
حديثي ماشي مع من والى.
مرحبا بالفاهمين
وبالضعف يشعرو الجهالة
بقلم الدويدة عبدالرزاق