دي الحكاية... بقلم الشاعر الراقي السيد محمد صابر

دى الحكاية !!!!
==========
الحكاية ....
كل شئ وله نهاية
صبرى يمكن فاض وغطى
حلمى كان محتار معايا
عمرى عيشته
وكل شئ فى الدنيا شوفته
كل تفاصيل الرواية
ولما مر العمر بيا
والسنين هجمت عليا
وشعر شاب وأبيض كله
قولت يمكن دى النهاية
الكل لام وقالى عيش
دنيا فانية ومتساويش
الحياة من تانى تبدأ
ليه تخلى العمر جيش
ولما تطلع ع المعاش
تبتدى تانى تعيش
قولت ماشى هتكون بداية
ونبتدى تانى الحكاية
اخدت خطوة
وتانى خطوة
لاقيت ناسى مش معايا
ليه فاتونى وزهقوا منى
وفى الطريق اتخلوا عنى
وباعوا كل شئ كأنى
غريب وظاهر فى المرايا
قولت اعوض بالصحاب
هم دول اللى يفهمونى
شعراء وليهم الف باب
والطريق لو ألف خطوة
خطوة خطوة انول منايا
لما شركا الحلم يبقوا
كلهم واقفين معايا
وابتدينا الحلم لكن
ايه حصل بعد البداية
إتغيرت كل الوشوش
وإتبدلت كل النفوس
واتفرقوا ونفس الحكاية
الف قصة والف غنوة
ومسرحية وكام رواية
وأصله قال وهى قالت
والصغير عمل كبير
والنكرة كمان ياحضرة
عاش فى توب أنه الأمير
والدسيسة بقت قانون
حبيت أجمع من جديد
وافترض حسن النوايا
لقيتنى بحرت جوه مية
والعقول ماهياش معايا
كل واحد حس أنه
إتظلم وانداس عليه
والكلام أصل الحكاية
كأنه متفصل عليه
دا شتمنى وقال عليا
ودا جاب سيرة الولية
ودا فاكرها مهلبية
ودا جاى بس شوية
لما يظهر شئ جديد
ودا أسف ياناس لأنه
بالصراحة ماهوش سعيد
ودى خايفة م اللى جاى
يتقال عليها معجبة
ودى بصراحة عايزة تبعد
قال ايه ياناس مستغربة
م اللى جارى واللى حاصل
والتانية ماسكها كهربة
قولت يعنى خلاص لوحدى
بردو مشوارى هاكمله
والنجاح بيتعب صحابى
طب بس ايه أنا اعمله
قولت أصبر ما انت صابر
والإله لعباده جابر
بإيده هتكون النهاية
============
السيد محمد صابر