بقلم الاستاذ.. النميري نافع.. جوه الأتوبيس

السلام عليكم ورحمة الله وبركاته..

اول مره انزل حاجه في المنتدى..

معايا قصيدة اسمها

... جوه الأتوبيس ....

..جوه الأتوبيس

عالم مهاويس..

عالم محابيس..

من غير ترابيس..

.. جوه الأتوبيس

فستان وقميص..

كمسري ورئيس..

.. جوه الأتوبيس

جنب الشباك..

فيه ست هناك..

ساده ودانها م التهييس..

... جوه الأتوبيس

كلام وحديت..

... جوه الأتوبيس

أحاسيس..

... جوه الأتوبيس

عيال ناس...

وعيال خلابيص..

... جوه الأتوبيس

إلهام ولميس..

رسموا أحلامهم ف الكراريس..

.... جوه الأتوبيس

ناس تعبانه..

ناس مهمومه..

وناس شايله همومها ف كيس..

.... جوه الأتوبيس..

ناس سرحانه..

ناس شقيانه..

.... جوه الأتوبيس

اباليس..

... جوه الأتوبيس

عم احمد سارح ف المصاريف..

ودخول رمضان..

وهدوم العيد..

والبيت قديم محتاج تنكيس..

.... جوه الأتوبيس

أطفال وكبار...

ستات وبنات..

وعيال ع الفيس..

.... جوه الأتوبيس

حياه...

مسرح كبير..

مليان تمثيل..

ناس ع الخشبه..

وناس تمامها ف الكواليس..

... جوه الأتوبيس

طرق سالكه..

وطرق مقفوله بالمتاريس..

... جوه الأتوبيس

اعمل كل حساب للخطوه..

واقطع تذكره...

أصله ساعات..

يطلع تفتيش..

... جوه الأتوبيس

مفيش احلام..

كلها كوابيس..

دنيا غريبه...

هريانا تلطيش..

... جوه الأتوبيس

اسبوع مولود..

وانسان مفقود...

وساعات زغروته كل خميس...

... جوه الأتوبيس

صدق وإخلاص..

كدب وتدليس..

... جوه الأتوبيس

الست هنيه مستنيه..

ابنها نازل بكره اجازه..

عسكري في الجيش..

فرحه قريب..

كان هادي و طيب..

جولها صحابه..

بهيصه وزفه..

افرحي ياما..

احنا حدانا الليله عريس..

... جوه الأتوبيس

دخان وحشيش..

شباب طالعه..

وشباب نازله..

شباب حاضره..

وشباب غايبه..

وشباب مهمومه..

بأكل العيش..

... جوه الأتوبيس

منفوش الريش..

شغال تهبيش..

خلونا نعيش..

بالله يا شاويش..

اقبض على كل الدراويش..

عاملين ازعاج..

جوه الأتوبيس...

... جوه الأتوبيس

كل القاعدين ثابتين...

وكل الركاب..

طالعين نازلين..

مفيش مقاييس

كله ماشي بالتهييس..

... جوه الأتوبيس

فيه رقاصه..

جنب السواق..

عماله بتهز..

والعيشه بتلذ..

شد وجذب..

خخد وهات..

شدت هي فرامل اليد..

الغاز انكب..

ولعة نار..

جرس إنذار..

إسعاف ودمار..

عين وصابتنا..

شفت الإنجاز..

لأ شفت البرج..

طب يلا يا خورج..

... جوه الأتوبيس

ماضي مهانه..

حاضر ذل..

... جوه الأتوبيس

مستقبل ضايع..

بحزام ناسف..

لجبان وخسيس..

.. جوه الأتوبيس..

        ... تحياتي

... النميري نافع