الشاعر /حسانين غندور ...يكتب ... ناس والدنيا بايعاها ...

ناس والدنيا بايعاها
في ناس الدنيا بايعاها
وناس الحياه رافضاها
وناس السكينة سارقاها
وناس بتقول يا قادر
في ناس الحيرة في قلوبها
وناس السيرة في عيوبها
وناس الدمعة في عيونها
وناس تسيب الدنيا وتهاجر
في ناس الصبر مش فيها
وناس الحزن ماليها
وناس الهم مكفيها
وناس مغرورة على الآخر
في ناس حيرانة وتتألم
وناس الجرح فيها بيعلم
وناس تسكت وتسلم
وناس على أكل العيش بتسافر
في ناس بتلوم على دا الحال
وناس عيشتها دى موال
وناس عايشة ولا على البال
وناس مبتعملش لحد خاطر
في ناس قلبها موجوع
وناس جرحها مزروع
وناس فرحها ممنوع
وناس منها يا ساتر
(حسانين غندور)