الشاعر / النميرى نافع ....يكتب ...أزعل ...

السلام عليكم ورحمة الله وبركاته..
... أزعل ...
سألوني إيه ممكن يزعلك؟؟
يعني إيه ممكن يزعل فقير غلبان؟؟
قولتلهم يووووووه كتير..
                        دا انا م الزعل زعلان...

حمال الهموم حساس...
اصل الزعل ألوان..
فيه زعل له لون غميق..
وفيه زعل بهتان..

والفقر خلي الزعل لون واحد..
اسود كما القطران..

يا مفرق الرزق..
ارزقنا بفرح قريب..
وان كان ع الزعل..
هيجي ف أوانه..
مهوش كربان..

ونصيحه م الزعلان..
لما يخبط عليك الزعل افتح..
وخده بالاحضان وازعل..
ازعل كمان وكمان..
ازعل على الإنسان..

ازعل ع اللي مات مقهور في سجنه..
وازعل ع اللي مات غدر ف كمين..
              وسلاحه جوا حضنه..

وازعل ع اللي عشان عياله..
                         مات ف غربه...
وازعل ع اللي عايش بعياله..
                               في تربه..
ازعل ع اللي حياته ف بلده..
                                      كربه في كربه...

وازعل ع اللي كل همه..
ازاي يراضي ام العيال..
ومش مهم أن زعل أمه..

وازعل ع اللي كان سبب في موت ابوه..
من كتر مشاكله وهمه..
كان طول عمره مبعتر..
ومش قادر يلمه..

وازعل ع المظلوم ظلم بين..
وقلبه مجروح وساكت..
                           مش مبين..
           خايف من بطش الجبارين..
                           بس بيشكي لربه همه..

ازعل ع اللي حقه ضايع ف بلده..
            اللي حاسس جوا أرضه بغربه...
ازعل على حق ضايع..
                         نهبينه عصبة..

ازعل على طفل مات في حضن ابوه..
وكم مليار انسان شافوه..
وصوروه..
الاسم محمد..
والدره ابوه..
والصابره تبقى أمه..

ازعل على قلب أخضر..
كان حامي الوطن..
كان على طول ماشي بكفن..
كان ضهر ابوه..
كان قلب أمه..
كان كل حلمه..
يريح ابوه ويحج بأمه..
وف عز حلمه..
جت رصاصة غدر عارفه..
مكنتش طايشه..
صابت القلب الأخضر..
جت في مقتل..
مات الحلم في ثانيه..
وفضل..
كسرة ضهر أبوه..
وحرقة قلب أمه..

وازعل زعل مخصوص..
الزعل اللي هو يكسرك..
الزعل اللي يرفع ضغطك سكرك..
زعل يقتل روحك..
يغير ملامحك منظرك...

ودا زعل عواد..
عواد اللي فرط ف أرضه..
عواد اللي فرط ف عرضه..
عواد اللي اهملك...

أزعل ع اللي عايش اليوم بيومه..
شقيان تعبان..
علشان لقمة عيش حلال...
وازعل ع اللي مش فارق معاه..
                   عايشها شمال...

وازعل ع العشره لما تهون..
وازعل على الذكرى لما تصير دخان..
                                    اصل الزعل ألوان..

بس عمري ما ازعل..
                        على فرقة خسيس..
                          ولا موت جبان..

                       بزعل بس..
                                 على الإنسان..

              .... تحياتي

                              النميرى نافع.