الشاعر/صبرى حسين ....يكتب ....فات الاوان ..

( فات الاوان )كلمات/صبري حسين
******************************
ماشي في حالي
وصلت لتقاطع طرق
قابلته
عيني جريت عليه
قلبي دق
مديت ايدي
سلمت عليه
مع انه لا يعرفني ولا اعرفه
وقفنا  نتكلم
عيونا علي بعض بتسلم
الوقت اتحدانا
الساعة بقت دقيقة
كانت  بسرعة تجري
اتكلمنا في كل حاجة
حكاينا لبعض قصة حياتنا
بوحنا عن اللي يفرحنا واللي يزعلنا
رفعنا الستارة عن نفوسنا
حاسينا بأاوجعانا
كلام محتاج سنين
أتقال في دقيقة او اتنين
كلام كان باين
فيه الحنين
حروف متعطرة بالفل والياسمين
كل ما نسكت
تتكلم العيون
في نفس واحد انت كنت فين
كنا فين عن بعض تايهين
عن بعض متغربين
قلوبنا عطشانين
من بعض محرومين
من الفرحة نسينا
اننا واقفين
في تقاطع طريقين
بصت في ساعتها
قالت  تسمح انا كدة تأخرت
كلامنا سرق الوقت
احنا لينا  تلت ساعات واقفين
لازم  امشي
العيون بالدموع اتكلمت
معقولة تمشي
انا ماصدقت لاقيتك
انا كتير حلمت بك
اتخيلتك
اتمنيتك
قالت احساسي هو احساسك
لكن  انا لي طريقي وانت لك طريقك
احنا واقفين علي مفترق طرق
اتأخر. ااوي لقاءنا
مشاعرنا الصح جات في الوقت الغلط
مافيش داعي للغضب
صدقني طريقي غير طريقك
ايدي مش هاين عليها تسيب ايديها
عيني بتتوسل لعنيها
سحبت ايديها من ايدي
الدموع في عيونا احنا الاتنين
من غير سلام ولا كلام
مشيت يمين وانا شمال
عرفنا ان. اللقا محال
لاننا اتقابلنا بعد فوات الاوان
صبري حسين