الشاعر /جمال زكى عينر ....يكتب ...آخر مشهد ...

( آخر مشهد ) :

امتى نشوف بقى مشهد تاني ؟
فيه الدنيا بمنظر تاني
مشهد فيه الدنيا بتضحك
مشهد ابدد بيه احزاني
قالوا كتير عن نفس المشهد
وانا جه دوري اقر واشهد
نفس المشهد بيعيد نفسه
كلاكيت ولا ميت الف ومرة
نفس المشهد هو بنفسه
نفس الجرعه ونفس الجره
امتى يارب ندوق الحلوه ؟
اتجرعنا كتير م المره
نفس المشهد شفناه كتير
نفس الدور نفس الاخراج
حاولوا كتير يلاقوله تفسير
علشان يهربوا م الاحراج
لكن ربك له تدبير
بعد السجن أكيد افراج
مشهد كل الناس عارفينه
حتى الدور والله حافظينه
مهما يغيروا في التفاصيل
صعب يغيروا ارضه وطينه
مشهد مرسوم في الكراس
ملت منه خلاص الناس
عايزين مشهد مرة جديد
بس يكون معمول له اساس
مشهد لازم يبقى له حد
بعد السبت بييجي الحد
كل بداية وليها نهايه
بعد الفوضى اكيد فيه جد
وعشان نرسم مشهد تاني
مش عايزين ولا حد اناني
لازم تبقى الايد في الايد
نتعب حبه كمان ونعاني
حبه بحبه حتيجي الفرحه
زي عروسة ولابسة الطرحه
مصر بلدنا اكيد محروسه
وحتسلم م الايد الجارحه
حتعدي الازمة وهتروح
حتى ولو حتصيبنا جروح
والصورة الحلوة حتتجدد
وعن فرحتنا العالم يشهد
وتعود البسمة على وجوهنا
وبكده يبقى ده آخر مشهد

       بقلمي الشاعر جمال زكي عينر