الأستاذ... النميري نافع... يكتب... عم ياصيدلي..

السلام عليكم ورحمة الله وبركاته..

...  عم يا صيدلي ...

عم يا صيدلي..
شوفلنا دوا زين..
للحال اللي وصلنا ليه..

عايزه دوا يكون عفى..
عايزك تحط كل خبرتك فيه..
عايزه دوا سريع المفعول..
تاخد الجرعه منه..
يقول على طول..

يعني يا ريت يكون..
وريد او بخاخ..
وابعد.. ابعد وبقولك اهه..
عن الحقن واللبوس..
لبسنا كتير..
و كفايه اللي إحنا فيه..

عايزه دوا مفعوله ممتد..
ياخده الطفل م الولاده..
يفضل معاه لوووووووين ما تعد..
تاخده الأم في الحمل..
تخلف انسان حر..

ولد ولا بنت مش مهم...
المهم انه يقول الحق..
ولو كان مر..

عايزه دوا مناسب..
لكل الأعمار..
شباب شابات..
وأطفال صغار..
وركزلي شويه..
ع المسئولين الكبار..

عايزه دوا..
استعمالاته كتير..
دوا يعالج الأمراض العضال..
من غير عمليات..
ومن غير تخدير..

دوا يعالج الأمراض المستعصية..
ومش مهم..
لو ذودنا الجرعه شويه..

بس وحياااااة ابوك...
عايز مفعوله اكيد..
وخصوصا في حالتين مهمين..
حالتين اخرونا كتير..
التدليس والمحسوبية..

عايزه دوا اورجانيك..
مالوش أعراض جانبية..
مش نعالج التدليس والمحسوبية..
تطلعلنا الغباوه و السلبيه..
ايوه بالله عليك..
يا عم الصيدلي..
ركز شويه..
مش ناقصه هيه..

عايزه دوا فريش وحبوب..
دوا مفيهشي عيوب..
تاخد الجرعه منه..
تحس المخ يتفرمط..
وتطلب معاه حريه..
وتطلب كمان..
حقوق منسيه..

ويا ريت ما يطلبش..
مسخره فارغه..
و دباديب وقلوب..

عايزه دوا تصنيع محلي..
وعايز طعمه عادي..
مش مسكر مش محلى..

وأهم حاجه..
عايز الماده الفعاله نقيه..
يعني بيور..
عايزها ماده اصيله..
مش ملعوب في أساسها..
دي علاج يا صاحبي..
مهياش ماده..
في الدستور..

عايزه لما ينزل السوق..
تكون كمياته كتير..
وسعره رخيص..
يعني الجرعه لشخص واحد..
أرخص من قرص اسبرين..
ولا قرص نوفالجين..
ولا شوب عصير..

عايزه لما ينزل الخميس..
في الصيدليات..
الجمعه..
تلاقي مصر بعيالها..
في التحرير..

            ... تحياتي

                         النميرى نافع