الأستاذ... النميري نافع... يكتب... فيها حاجة زينه...

السلام عليكم ورحمة الله وبركاته..
كل عام وانتم بخير..

       ... فيها حاجه زينه ...

فيها ألف حاجه وحشه..
بس فيها حاجات كتير..
             والله زينه..

فيها اب..
وفيها اخت وفيها اخ..
وفيها خال..
وفيها عم..
وفيها صاحب..
زي اخ..
ابنك بيقوله يا عم..
            والمهم والأهم..
فيها حاجه بدعاها..
        يزول الهم..
                     فيها ام..

فيها ناس من زرعها..
                    بناكل مم..
وفيها ناس من زرعها..
                           بنشرب سم..
وناس كلامها خير..
وناس كلامها نم..
وناس بتستر لحمها..
وناس سيباه..
               بيشلب دم..

فيها طفل..
شايل كتابه في شنطته..
عارف طريقه..
واخد قراره..

وفيها طفل..
رايح حفلته..
لابس بدلته..
ومعاه جيتاره..

وفيها طفل..
شايل سلاح..
ونار ف صدره..
وحالف ياخد بتاره..

                   فيها جهل وفيها علم..

اوعي حد يشتمها..
ولا يقل منها..
                  قدامك..
وتسمع وتسكت..
           دا الأم..
مهما قسيت على ولادها..
                 
                          برضو ام..

فيها هضبه وفيها كينج..
وفيها عندليب وسوما..
وفيها بيبو وفيها صالح..
وفيها شيكا..
وفيها بيكا..

               فيها فرح وفيها غم..

فيها شاب..
ع الحدود..
واقف بيحرس..
سلاحه ف حضنه..
وعيونه وسط راسه..

وفيها شاب..
واقف على ناصية شارعهم..
بيعاكس في اللي رايح..
              واللي جاي..
مطوته ف ايده..
وساعات..
بيهرش بيها ف راسه..

                    فيها عدل وفيها ظلم..

فيها اهرامات..
                     و سد..
        وفيها أوبرا..
فيها الجدعنه..
فيها الشهامه..
فيها شبرا..

فيها عيون بتضحك..
وعيون حابسه دمعه..
فيها وحش الشاشه..
وفيها سمعه..

                         فيها يقين وفيها وهم..

فيها زويل..
                  ونجيب وصلاح..
                                        وفيها السير..

فيها أدان بيدن..
                           وجرس..
                                   وفيها الدير..

فيها رانيا..
                    وفيها دينا..

رانيا سمكه..
                           ودينا بتفن لينا..

فيها مكي..
                وفيها منسي..
                                وفيها سعد..

فيها أسطورة وزعيم..
                     ومحمد ووعد..

فيها حنا وفيها جرجس..
                      واحمد وعبدالله ومينا..

              فيها حقيقه وفيها حلم..

فيها بحرين وقناه..
                   وفيها نيل ...
فيها شمس دافيه..
وفيها نسمة هوا..
                           تشفي العليل..

فيها كورنيش..
             بيتكلموا ف حضنه العاشقين..

وفيها ليل..
           بينام في حضنه..
                      الغلابه الشقيانين..

وفيها فجر..
يشق ليل..
يطلع صباح..
يشع نور..
يفتح طريق..
كله خير..
لخلق على الله متوكلين..

                         فيها مدح وفيها ذم..

فيها ألف حاجه وحشه..
             بس فيها حاجات كتير..
                                      والله زينه..

                 كان ليا فيها اب غالي..
                       راح وسابني..
                         لأغلى ام..

                ... تحياتي

                            النميرى نافع