(((حادثة قطار)))
القلب خايف م العذاب
و العقل حاير فى الجواب
الناس دى ليه و ازاي تموت
و ازاي يكون عيشهم عذاب
إزاي يموت فينا الأمان
و ازاي يهون عمر الشباب
النار بتاكل كل شئ
و لا عادش فاضل غير خراب
حتى الأمل .. سافر بعيد
سافر و طار فوق السحاب
هنقول لمين و نروح لفين؟
و الفرح قافل كل باب
عارفين خلاص هنموت فطيس
من غير ملام .. من غير عتاب
و لا حد راح يسأل ف يوم
مالناش تمن .. و مفيش عقاب
مالناش نعيش وسط الكرام
مالناش نعيش غير فى التراب
و بندعى للمولى الكريم
هو الأمل وسط الصعاب
هو اللى جامع دول و دول
و ساعتها هيزول الضباب
فلا بد نتقابل ف يوم
ويا اللى سافر و اللى غاب
و اللى انحشر وسط الهموم
الكل هيكون ليه كتاب
و اللى انكتب ليك راح يكون
قدام عنيك من غير حجاب
و لا بد للظالم يكون
من غير أمل من غير صحاب
يفضل وحيد وسط الجحيم
و أشد ألوان العذاب
(أحمد سيد أحمد)
ليست هناك تعليقات:
إرسال تعليق