أشرف سيد أحمد يكتب ...

قطار بلادى

صفر قطرك يا بلادى
فكرنى بالأحباب
بالموت جاي بينادى
 كفاية مرار و عذاب
كفاية داب فؤادى
صفر صفر يا غراب
أحباب راحوا المرة دى
قبلهم رجال و شباب
قلب الأم داب بالأشواق
لضناها بعد غيابه شهور
بكرة راجع كفاية فراق
يا ابنى تعالى القلب مقهور
يا أمى بكرة التلاقى
ترجع يا ابنى لامك منصور
آه يا ابنى انت الباقى
أبوك قلبه عليك مكسور
القطر جاى هانت
جا القطر بالدمار
حرق ناس كتير ماتت
و ناس شاربين المرار
فين حقوقهم ضاعت
يا ناس حرام و عار
كل يوم حقوق و راحت
 خلاص بقى بلاش أعذار
يا ابنى فينك منتظرين
لرؤياك اشتقنا يا حبيب
ع الرصيف صراخ و أنين
نيران و حريقها رهيب
ناس ماتت و ناس خايفين
بين القضبان مالى طبيب
بلاش يا أمى دموع العين
وداع يا إبنى اللقا نصيب
يا ابويا يا نور عينى
 من امبارح مستنيك
مفيش دموع هتكفينى
يا أبويا علشان أبكيك
يا سندى مش هيرضينى
غير حقك علشان ارضيك
و الأيام مش هتنسينى
   مرارى و حزنى عليك

          بقلمى

أشرف سيد أحمد على