الحلال والحرام ..............بقلم الدويدة عبدالرزاق

هذه القصيدة بعنوان الحلال والحرام 
الحلال غلة تعمر به المطامر
مفتاح الخير في الشدايد والمحنة 
الحرام شبع شرو من بعيد ظاهر 
شيطان أخرس مكسي باللعنة 
لابس الحلال كريم سلالة ما يكابر
خبزو معجون مذلق وبنة
قانع زمان بالقليل وشاكر
قلبو كبير سكناه لمحنة
سالك الحرام طريقو مسامر
لسانو صابون فراكة وجفنة
ساعة الوجيبة ديما حاضر
نديرو فاتحة يسبق يشد الركنة
الراكب لحلال طريقو بشاير
الشر يتحشاه الخير فيه يتسنى
حزامو السلامة بالنعمة ماكافر
كلامو قصيدة ميزان وغنة
كرش الحرام الشر منو يتقاطر
عينو بارود تصيب الديب والرنة
رحى الخصومة مول النواعر
الله سد عليه أبواب الجنة
غمس الحلال او بلط النوادر
زول الحرام من طريقك
شد لمين وسوق وتعنگر
مول ليسر بزز منو يتسنى
سربيس الحرام سيسان الهياضر
حسابو حساب تخلاط العجنة
راس مالو موس وشواقر
ذبيحتو جيفة تقبس من باب لگرنة
كسيبة الحلال غنم الحواضر
حكمة السر في الكتاب والسنة
"كسيبةالحرام حمير وكيادر
صداعهم ناقوس واهل الكنة
زريعة لحلال ماس وجواهر
تغني مولاه لهيه ولهنا
زريعة الحرام تبن وغباير
ما تكيل عبرة ما تهز حفنة
فاسوخ الحرام شعيل المجامر
فيخراتو صرتو وصرنا
تباخير الحلال جاوي حر
حجاباتو دعاوي محصنة .
صينية لحلال براد مشحر
ساقيه حديث ومعنى
ليقامتو نعناع ملقم او عنبر
ريحتو مشموم يرد الفطنة
بقلم الدويدة عبدالرزاق