الاستاذ... أحمد محمود عوض... يكتب.. إلى الاخ العاق

إلى الأخ العاق
إن شاء الله

هنتحمل هنتحمل
ومهما تضيق هنتحمل
تشد اليوم
تهون بعده
ونلبس توب
 سنة لوحده
ومهما الصيف
 يزيد صهده
هنصبر ليه وهنكمل
هنتحمل هنتحمل

أغب الموت وأتجرع
ولا اساوم على صوتي
ولا احني الراس أو اطبع
ولا اتاجر بنبوتي
ومهما حاولوا إذلالي
أو احتالو على سقوطي
هتفضل راسي مرفوعة
ولو مالت يكون موتي

أنا مصري وأمجادي
في كل أماكن الدنيا
ومن خيري شبع غيري
بلا منة ولا تانية (الأذى)
وكفي عمرها الأعلى
وداري المأوى والحامية
ولو دار الزمان عني
في مرة هترجع التانية
بقول للدنيا مش هركع
ولو ف حصاري كان موتي

هنتحمل عشان بكرة
ونكسي الرملة بالخضرة
عشان النخل يتعافى
وتنبت كل يوم شجرة
يعود الصبح يتباهى
ببسمة وجهنا النضرة
ويرجع بحرنا صافي
ورقة نسمته العطرة
يضل النيل يدوم يجري
وتصحاله الغيطان بدري
ما بين قبلي وبين بحري
أخوة تدوم لها العشرة

عشان ابنك عشان ابني
وتفضل مصر روح تبني
هنتحمل صعاب اليوم
وبعد الصعب رح نجني
هنقسم لقمة الخبزة
معاها الملحة ما تعيبني
ولا يكسرني بحصاره
قريب أو أخ بيبيعني
بنشقى نجهز الزرعة
شهور مع شحة الترعة
نشوف السنبلة طالعة
يهون الصعب ويعدي

عشان يفضل لنا الأزهر
ومسجد عمرو والمنبر
تضل كنيسة العذرا
معاها معابد الأقصر
نطالع موسى بيعاين
تجلي الخالق الأكبر
وروح مينا تنادينا
تسمع للهرم الاكبر
يا مصري إصحى لبلادك
وإحفظ مجد أجدادك
ميراثك صونه لاولادك
ذئاب الشر بتكشر

أحمد محمود عوض سعيد
الرحامنة / فارسكور / دمياط