الوشوش  ألوان    ( 113)
........................
وبتخدعنا   الوشوش
ألوان  صبغه   ورتوش
شايفينه   ده  وش   عادي 
جواه   درزن   وشوش 
صدقناه  وفى  ضميرنا 
ده  بياضه  ما  فيش  خدوش
ضحكاية   بألف   نيه 
في  قلوب   ما  بيرحموش
بتعكر    مايه   صافيه 
تدبل   ورد   النفوس 
بنشوف  سبحه  وحكايه 
بنقول  تقوى  وبشوش
ده   لا   كمل  نص  خطوة 
بقى  تاني  ما  نعرفوش
وأدي   وش   يهد   غيره
لمجرد  ما  يشفوش   
بنصدق  ليه  الوشوش   ... 
ألوان  من  كل  طينه 
فضحى   دهانها   الكفوف
ورا   كل  لون   حكايه 
بتلون   خوف   بخوف     
قناع  من  الكدب  زايف
وسواد  مالي  الرفوف 
بنفصل  توب  لغيرنا 
بنفاق   كل   الحروف
أدي  وش  خيال  مآته 
تتنظم  له  الصفوف 
وندوس  على  وش  طاهر 
نحلف  ولا  شوفنهوش
مين  فينا   لسان  نفاقه 
دبلان   وما   غيروش
يرويه  من  كل  سيره
عطشان  ولا  كفهوش 
والضحكه  كمان   حكايه
في  خداعها   ما   شوفنهوش
نحزن  مع   فرح   غيرنا
نبكي   وترقص  وشوشنا 
ونطبل   عالدفوف   
ونعلي    في  دار   خداعنا 
أدوار   ساكنها   خوف
وهييجي  يوم   وداعنا 
هنموت   يفضل   وجعنا 
في  حسابنا   ومين  يحوش 
مثيلنا   في  100  روايه
مسرح  فوق   الوشوش
بقلم  ..  صبري رسلان