الشاعر بسيوني صديق يكتب ...

قصيدة اه يازمن
----------------
اه يازمن والف اه
والاهات حزينه بدبح
بسكينه تلمه
ياريتها حاميه
كانت خلصتنا بدبحة
بتعمل حساب للناس
وانت عند الناس مش فارق
خلاص الكل فقد الاحساس
مسيرك يابن ادم يوم تفارق
كلام زي الرصاص
بس للي يعرفه ويفهم
******************
اه يازمن والف اه
عيشه وايام بنعيشها
بحلوها بمرها بغباوتها
احسبها زي ماتحسبها
الكل بينتش في بعضه
زي الحيوانات المفترسه
لما تتلم علي فريستها
والاخر مين يفوز ويكسب
بقي ده حالنا
والحق بقي يغضب
*****************
اه يازمن والف اه
الضحك ع الدقون بقي فهلوة
والكل فاكرها شطارة
ياخسارة ع البهدله
والضرب ع الرؤس
والطرق بالمطرقه
خلانا ع الغالي ندوس
والحياء بقي مزرطه
******************
اه يازمن والف اه
اه يازمن الصح فيه بقي غلط
والغلط هو اللي ماشي
وبقي عسل وعليه الطلب
ولو اقدمت النصيحة
تبقي فضيحة وكلامك غلط
ويقولولك ابعد يابومخ زلط
*******************
اه يازمن والف اه
هايفيد بايه الكلام
واحنا مش عاوزين نسمع
والودن اتملت بالزفت والقطران
واللي علي هواها بتسمع
واللسان بقي زي الفرقله
يتكلم ع الفاضي والمليان
ويرط ويرطرط
********************
اه يازمن والف اه
يازمن العقل فيه اتهوس واتلخبط
وخلي الناس علي بعضها تسخط
في ايه تاني يازمن ماقولناهوش
اه الضحكة الصفرة والوشوش
زي اللبن الرايب والمغشوش
حوش عنا يارب حوش
اه يازمن والف اه
*****************************
كلمات بسيوني صديق