القطر مش قطري

أيوه فعلا قطري فات
والسكة فاتحه لقطرها
شريدة بتلملم حاجات
وكأني كنت ف ذهنها
من فوق رصيف الإنتظار
بصيت عليها وشفتها
مدت إيديها ومن سكات
صرخت بلوعة قلبها
إن في العمر اللي فات
ملقتش حد يحبها
وحيده عايشه في ذكريات
مرسوم أساها ف وشها
الحلم جوه عنيها مات
وآلام كتير بتضمها
بصت وشافت نظرتي
صرخت بلوعة قلبها
كلام عيون مس الوتر
وغرقت حزن في بحرها
عديت بسرعة ومن سكات
لقتني واقف جنبها
ضحكت وصحيت من سبات
والفرحة كات بتهزها
من قلب بحر الغرقانين
مديت إيديه لحقتها
حسيت وكأن السنين
فرشت كيانا بفرحها
مسكت في إيدي وكلبشت
وروحنا نركب قطرها
بس العجيبه والغريبه
بقا إنها
قعدت تدور ف الوجوه
على حد كان يشبه لها
على ذكرى غابت عنها
على بيضه فاسدة اتدحرجت
وإتدحرجت
هي كمان راحت لها
فارس ومصنوع م الورق
للقهر كان بيشدها
نسيت حناني ووقفتي
وخلت حنيني ف ضهرها
وف المحطة الأولى لينا
رمتني من باب قطرها

خالد موسى السد