الضاما ... بقلم عمر بنحيدي

الضاما:١

كثرات  لفهاما
 و بنادم  يتعاما
ما طالب السلاما
بحال إلى  لاعب ضاما
ياكل وينفخ ٢
يكوي ويبخ
كولشي تمسخ
 الله يحضر السلاما .
ماكاين غير كول ماجاك
كول لاش تخمم ف.اللي حداك.
قانون اللعبة هو هذاك
كولها يقول انا ناكول البيدق
ولاخر يحني ظهرو للدق.
كول وقول
الله يخلف على من نفق
و  الصحة اللي عطا الشدق
لا .لا.    لا..
ماشي معقول
شي يحرث الفول
وشي يصرطو يصير غول
كولشي بغا يضيم
ماهمو يطيح على خوه الضيم
هو  ماعندوش. .. عديم
يترجى الله لكريم
يشوف من حالو
هو واللي بحالو.

1:  الضاما: شطرنج تقليدي
2: ياكل وينفخ:    أي انه يربح مرتين في  اللعب . بيدقه ينتقل خطوة إلى الامام و في الوقت نفسه يأخذ  بيدق خصمه .
عمر بنحيدي     25/12/2018