الطريق الدوازة ما تنوض ربيع
والمرا المعكازة ما تنفعك بنفيع
خوذ درازة حادكة تراري برضيع
قلة فوق كرزازة سبع صنيع وزريع
مرضية عينها ما فازة ليك تطيع
حشمانة ما فنزازة من اصل رفيع
سخية وما حرازة مطبوعة طبيع 
كريمة وحكيمة لخير مدفق ودايع
ما نقازة ما حنزازة عقلها ما صايع
حديث ومغزل وقتها ما ضايع       
مرزنة ريها معلل بكلام مغربل
مأدبة ما تقطع حديث تقطيع
وكلامها موزون مرزون وبديع
يا لعلام وياك الخيل القزقازة
نوصيك يا لباردي إلا كنت علام
تخير العود لمخنتر يكون سريع
العودة الركالة الحرانة الحنقازة
ما تجر محراث ما تدرس عرمات 
بدلها تفك منها باشما كان بيع
وقت الدزازة فكر في لعجاجة
كيل الزرع تلي لخواتم ولودع
خلي لهتوف أو شوف الصوف
تكون مرتك شغالة تقرشل وتغزل
والدرازة  تنج حايك محربل
جابدور وجلابة سوسدي مزرول
بلغة فاسية وسلهام بلدي مثقل
 الطبيب ما يقصر عمر ما يطول
صحتك في ماكلتك سال وسول
من الشجرة كول غلة في وقتها
غلة تكفي وتشفي المريض لمعلعل
ربي ميزنا على من خلق بالعقل
تمتع بالدنيا وطيع ربي زين لعطية
لازم لاجال يوصل على الدوام لا تعول

محمد المؤذن مؤسس ورئيس جمعية كازابلانكا للتراث الشعبي والتنمية والتربية على المواطنة