هذه القصيدة بعنوان علاش يا البحر  وهي بالعامية المغربية
علاش يا لبحر
علاش كثر فيك الغدر
حلم الإنسان فيك تقبر
وقلب الميمة على ولدها تقهر
من بعد ما كان يتمنى
للشط الأخر يعبر
عيات ما تسنى عيات بالصبر
تصلي في كل عشية وفي كل الفجر
إيه يا البحر تحولات فيك الطريق للحريق
والإنسان صار فيك غريق
هزو الما وكلاه الحوت
غدراتو قوارب الموت
السفينة اللي داتو
تحولات للتابوت
الأمواج اللي تاق فيها خدعاتو
وللشط الأخر رماتو
ما عتقاتو ما رحماتو
علاش يا البحر
علاش وليت بحال الزمان
تغدر وتخون
ما رحمتي  الإنسان
بكيتي العيون
علاش يا البحر علاش تغدر
شحال تغناو بك الشعرا
وصيدو فيك البحارة
يا خسارة عليك يا البحر يا خسارة
كن كنت. يا البحر
تهضر وتكلم
كن عرفت سر من اسرارك
سعى انت يا البحر اخرس واصم
تحتاج من يسبر اغوارك
امواجك العالية ورياحك العاتية
شحال تركات من قلوب دامية
وعيون باكية
وشحال غرقات من سفينة
وخلات فالقلوب غبينة
يا البحر مرة تكون ساكن هادي
يصيبك الفتور
ومرة تغضب وتهيج وتثور
بحالتك غير راضي
إيه يا البحر شحال من واحد رجعتيه مشهور ..
وشحال من قلب دميتيه. وخليتيه مقهور
وشحال من واحد تاق فيك وصابو الغرور
سعى انت يا البحر
خدعتيه وطعنتيه في الظهر
علاش يا البحر كثر فيك الغدر
علاش يا البحر
علاش  يا البحر
بقلم الدويدة عبدالرزاق