شحات وغاوي انزحه
*******************
شحات وغاوي انزحه
ماشي وراك عينه عليك
تديله من خيرك تريحه
يقعد يحاسبك ويرازى فيك
يرجع ويقولك اديني لله
شحات مافيش عاوز اعيش
بجاحه ورزاله تحيرك معاه
يقلعك هدومك يخليك مافيش
شحات عاوز للعيله والجيران
رطل لحمه وبرميل طرشي
وخمسين قفص جوافه ورمان
طماع ولا انت راجل محتال
شحات زي القطر القشاش
بيشرب الحلو كله واكله بلاش
عايش في وكاله من غير بواب
طالع نازل رايح جاي
عينه مد وره فاتح الابواب
بيقول علي نفسه فقير متعوس
عنده جبال مليانه فلوس
وعنده عمارتين علي ناصيتين
غير الاراضى والعربيات
والدكاكين والفدادين
والفكه معاه ملهاش عدد
غير الحولات والشيكات
وكاتب علي الناس كمبيالات
وفي المولد مدد مدد
مدد ياشيخ العرب مدد
ولابس مقطع ومبهدل
وشواله مليان ومحمل
بالحمص وحب العزيز
والسمسميه والحلويات
بالذمه يا خلق ده شحات
ده احسن مني ومنك
واحسن من البهوات
انا من بكره ها اشتغل شحات
واسيب الوظيفه الميري
بلا هم بلا ترقيات
 كلمات
بسيوني صديق