كيد الرجال ... بقلم الشاعر الدويدة عبد الرزاق

هذه القصيدة بعنوان كيد الرجال وهي بالعامية المغربية
مسكينة يا لبنية
علاش تديري في الولد النية
وتلاقاي معاه في العشية
ويقدم لك مشموم الورد هدية
يگول ليك كلام معسول
مزوق ومغزول
انا ليك وانت ليا
او يبعث ليك شي مرسول
اجي نقضيو ليلة هنية
اياكي تيقي
ومن الحلم فيقي
راه تيخدع فيك
يعطيك الوعود
ويخالف العهود
الأمر عندو غير تسلية
ما يغرك المظهر
ينال منك ويظفر
ويعطيك بالقفا والظهر
ويخليك تصارعي مع القدر
جعلي لراسك الشان
وما تخرجيش مع فلان او فرتلان
حتى تتعلمي من الدنيا
كما تعلمو ناس زمان
وتقراي كيد الرجال
اللي تيضحكو على الفتيات
كما تيضحك الدجال
على النسا والعيالات
يا لبنية ديري مزية
ولا تيقي فالكلام المعسول
المزوق والمطرز. ومغزول
سمعي مني هاذ النصيحة
إلى بغيتي تعيشي عيشة هنية
بقلم الدويدة عبدالرزاق