جوه قلبي .... بقلم الشاعر الراقي أحمد سيد أحمد

جوه قلبى الحب دافى
زى نور الشمس صافى
و الحياة بالحب تحلى
يبقى كل مافيها شافى
جوه قلبى الشوق بينده
ع اللى سافر يوم بعيد
اللى ساب بدل المودة
دمع ينزل كل عيد
اللى فات جوايا صورته
سابنى مشغول ويا سيرته
كان منايا يكون معايا
بس فاتنى خلاص وحيد
نفسى أعرف بس فينه
ليه يروح من غير سلام
د اللى كان بينى و بينه
حاجه أقوى من الغرام
بعد عمر من الحنين
جوه دنيا العاشقين
يتولد فينا الأنين
و الفراق قاسى و عنيد
إفتكرنى يا كل عمرى
و افتكر حبى اللى كان
إفتكر أيام هوانا
و افتكر قلبى اللى هان
و اعرف انى بموت ف بعدك
رغم جرحك .. رغم عندك
دمعى عذبنى ف غيابك
ليه بتقفل بس بابك
د اللى فاضل ليا بعدك
قلب جوه الكون شريد
(أحمد سيد أحمد)