(ازمة ضمير)........رضا ابو شنب

قصيدتي الجديدة
بعد تسجيلها وتوثيقها فيديو
(ازمة ضمير)
الازمة مش ازمة بلد
الازمة دايما في الضمير
الازمة بتكون في الادب
لما الصغير في المقام
يدوس تمللي عل الكبير
لما الغفير بيفتكر انه مدير
وبطرف عينه يبصلك
كانه مش عندك اجير
ولو بتشكي للمدير
سيادته مشغول بالمدام
قاعد وهيمان في الغرام
وتساله فين النظام
يبص من غير احترام
وينسي نفسه في الكلام
ويفتكر نفسه امير
واحد يغش في اللبن
ويزوده ميه وجير
واللي بيخلط العفن
ويسقي للناس العصير
الغش حتي في الرغيف
مرة يغشو في الميزان
ويسخطوه يبقي صغير
او يعجنو معاه التراب
ويحسسوك انه فطير
الازمة مش ازمة بلد
الازمة دايما في الضمير
فقير ومش لاقي الدوا
ولا حتي بيلاقي السرير
ولا حتي كلمة حنينة
تطمنه علي المصير
ولو بيشكي من مغص
يعاني من امراض كتير
ولوفي مرة تعترض
تبقي انت ارهابي كبير
الازمة مش ازمة بلد
الازمة دايما في الضمير
جزار كبير دابح غنم
وعجل حجمه يا ناس كبير
طول عمري بتعامل معاه
ويمسكوه بلحم الحمير
عايش حياتي في الطابور
واقف ومستني المصير
ولما تيجي جنبهم
تلقي الجنية منك يطير
الازمة مش ازمة بلد
الازمة دايما في الضمير

رضا ابو شنب
مصر
٣٠/٠٨/٢٠١٨