في وسط المآسي .. بقلم الشاعر: أحمد السيد أحمد

ف وسط المآسى تدوب العيون
تعاتب و تجرح و تبكى و تخون
و من كل نظرة بتحكى حكايات
دموع الحيارى على كل لون

ف وسط المآسى يتوه الأنين
و كل ابتسامة ف قلبك تهون
و لو جيت تعاتب تلاقى الحبيب
بيجرح و يعند و لا ليك يصون

ف وسط المآسى يضيع الوداد
و تلقى اللى باقى ملامة و ظنون
جراحك ف قلبك هتفضل تعيش
و تغرق عيونك ف بحر الجنون

بلاش تبكى عينك تلاقى الحياة
بترقص ، و فرحك ف قلبك يكون
و حزنك هيوصل لآخر مداه
تموت المآسى ف كل العيون
(احمدسيداحمد)