سكة سفر

    ماشى طريق الحياه
    خطاويا حيرانه
    خطوه تخدنى للأسى والحزن
    وخطوة الفرح تقلانه
   
    ماشى على أشواك
    والصرخه مكتومه
    على خدى دمعتى تجرى
    وأبتسم
    أتارى البسمه مظلومه

    شايل هموم ورحت لأحبابى
    مالقيت غير صدهم
    و بقلة حيلتى عايرونى
    قلت أترمى فى حضنهم
    بالجفا والقسوة جرحونى

    وقفت أنادى الصبر
    والحسره مليا الروح
    دنيتى عنوانها البكا والنوح
    النفس مكسوره
    والآهه جوه القلب محشوره
    تتمنى الصراخ والبوح

    الصبر سكه طويله
    ملهاش نهايه
    أدعى وأقول يارب
    منين هيا البدايه

                    أهى دى الحياه
                    هى ايه غير سكة سفر

                                                    احمد ابو زياد