في سجال جدايل شوق
=============
(1)
جدايل الشوق
بتجمعنا بأشوقنا تدفينا
أحبة وأخوة
وأحلامنا وأمانينا
تدوم اللمة والفرحة
ولا نسمع ولا مرة
مابينا يوم حروف مرة
ولا كلمة كمان جرحة
وطول ما احنا بلمتنا
بتعلى تملى ضحكتنا
وأفرحنا وأطرحنا
وألامنا وأوجعنا
تملى كمان بتجمعنا
ونتشارك سوا دايما
جدايل شوق
(2)
جدايل شوق
ونار البعد بتصحى
ف قلوبنا لهيب الشوق
بنشكى يوم ويوم نبكى
وعن ألامنا لم نحكى
لحبايبنا
وبنعانى وبندارى
وتبقى الدمعة فى عيونا
أنين مخنوق
ونقول يمكن ف يوم يرجع
يداوى جرح بات يوجع
يجدد فرحة فى قلوبنا
محاها الشوق
(3)
جدايل شوق
لأحبابنا جدلناها
فى الليل البعد
وذكرى حلوة تجمعنا
ولوحة جميلة رسمناها
لأيامنا اللى عشناها
ولما الهجر يوم زارنا
رمانا إحنا وقلوبنا
فى نار السهد
رجعنا تانى بنعانى
ونتقلب على جمره
وليل الحزن قام طول
وفرض علينا نسهرله
ونتذكر حبيب قاسى
ونجدل فى جدايل شوق
(4)
جدايل شوق
فى قلوب بتعانى من شوقها
بتتألم ما تتكلم ولا بتشكى
جدايل صبر
بمرارة بعد نجدلها
وبنصور نفسنا فيها
بنتلاقى
وقلوب للقرب مشتاقة
بتتمرد على الغيبة
وتقول للحبيب إرجع
بنجدلك جدايل شوق
(5)
جدايل شوق
بقول يمكن تكون هى
رسايل حبى ليك أنت
تبوحلك باللى جوايا
وتحكى عنى أنا حكاية
عن قلب عاش بيتمنى
فى يوم القرب يتهنى
ويحلم يوم تكون ليا
تسكن قلبى وعنيا
وأجدلك
جدايل شوق
(6)
جدايل شوق
بقول يمكن هتوصفلك
بقول يمكن هتحكيلك
وهتقولك إن أنا صابر
زرعت الصبر فى ارضى
وصبرت عليه
وجنيت الصبر مادانى
صبر يا ناس يصبرنى
وأنا أعمل إيه
زرعت الصبر من تانى
وقولت أصبر
ليوم نتقابل أنا وأنت
وأهديلك
جدايل شوق
(7)
جدايل شوق
بترفعنا نطير كدا فوق
أنا وأنت
عشان نحلم
ونحقق كل أحلامنا
ونتواعد مع نجمة
جنب البدر سهرانة
نحكى ليها أشواقنا
وندوق شهد أيامنا
ونودع كل ألامنا
وننسها
فى لحظة حلوة بنعيشها
تنسينا
ونغنى أحلى أغانينا
على لحن نبض أمانينا
أنا وأنت
ونرسمها فى أحلامنا
زهرة حلوة بألونها
وصوت كروان
ونعيش اللحظة فى الجنة
ونجدلها
جدايل شوق
(8)
جدايل شوق
ومن شوقى أنا أجدلها
لأجمل زهرة ف بستانى
ونسايم حب أرسلها
بتحمل نبض وجدانى
بقول ليها ياروح قلبى
خلاص البعد دمرنى
وأنا بستنى ألقاكى
ولحظة عشق تجمعنا
وأكون ف الحلم وياكى
ونتحدى أنا وأنت
طوفان الهجر
ونسهر ليلنا وهنحضن
شعاع الفجر
===============
السيد محمد صابر
ليست هناك تعليقات:
إرسال تعليق