مصر دنيا .... بقلم الشاعر احمد ابو زياد إدريس

مصر دنيا

    مصر هيا دنيا جنه
    كل اللى عاش فيها
    غنى
    واللى مازارها
    فى حلمه يتمنى
    فيها
    النفوس صافيه
   والضحكه دافيه
    وقلوب حنيتها
    تتغنى

    مصر
    الهرم والنيل
    ضحكة النهار
    وسحر الليل
    هواها يشفى العليل
    سمره بعيون كحيله
    تبتسم وتقول
    صباح الخير يا جميل

    مصر هيا
    ناسها الطيبين
    ضحكه من القلب طالعه
    إخوات حبايب
    مسيحين مسلمين

    مصر شعب عايش
    رغم الشقى فرحان
    فرحة طفل بهدوم العيد
    وفانوس رمضان
    نيته صافيه
    خالصه للرحمن
    سماه ماليه صوت
    جرس الكنايس
    وتكبيرة الاذان

    مصر هيا
    الشوارع والجناين
    والمدارس والغيطان
    على نيلها تتمشى
    تلقى عشاق
    وتسمع ضحكة الفرحان
    تتسلى بترمس ودره
    وأكلة بطاطا كمان
    وحنطور يأخدك تزور
    القلعه والحسين
    وتتفرج على جمال الخان

    مصر هيا
    حضارة وتاريخ
    وعلم حديث
    ومناره
    علمت الكون العماره

        هى دى مصر يا ساده

                                                احمد ابو زياد