مابين فترة وجيزة ...... بقلمي ... جمال حلمي ..

مابين فترة وجيزة
الكل أتقلب لحطام 
نسيوا العقل وسنينه 
وكأنه أصل ما كان ..
الكل بقا عقله هريسة
وقمر الدين كمان
وزبيب وشوية تحويجة
وتعويذة أردوغان
العقول راحت ف مصيبة
وعشقت التواهان
خلوا الجماعة الضريبة
يستولوا على البرشام
ضمائر بقت ببريزة
وبشمة وندغة دخان
أه من الدنيا الجديدة
وأه من الأيام
يوماتي بصبح ببلوى
وأمسي بمائة أتهام
من ناس فقدوا العقل
وصاروا حجارة وأوثان
واحد ضارب أمة
وفرج عليها الجيران
علشان تمن شمة
وقرص واحد برشام
والتاني ضارب أبوه
وسبه ف وسط ميدان
وثالث سارق سريقة
وبايعها لعره الرجال
علشان سجارة ملفوفة
تبلية بالسرطان ..
ورابع خاين مراتة
مع واحدة ماشية شمال
وحاجات من دى كتيرة
عايزة حصر وروقان
خضوا العقل مني
وفقدت الأتزان .....
أحوال كتيرة بشوفها
راشق فيها الشيطان
قلب الدنيا لحظيرة
لكل ضمير حيوان
والسبب والعيب فينا
أحنا اللي جرينا وراه
وحبينا الدنيا الحلوة
أم ألف لسان ....
أحوال الأنس غريبة
وما يرضى بها الجان
مصايب نزلة علينا
قول أشكال والوان
علشان فقدنا قيمتنا
وفقدنا الأحترام
ورب الأسرة ضاربها
جزمة ... ويقول دا تمام
والكل بيناقض نفسه
وعايشها جنان ف جنان
سايب السايب ف السايب
وعايش على الأمثال
أيام أبوة وامة وأجدادة
بتوع زمان .......
تشوفة تقول دا عاقل
وماشي بحق تمام
وزمام الأمور ف أيدة
وشادد كمان اللجام
وف الأصل واحد تافه
وعاله على النسوان ...
... خلص الكلام ......
بقلمي ... جمال حلمي .....
( خلص الكلام )