الشاعر/ النميرى نافع ...يكتب ...عشرة فى بير..

السلام عليكم ورحمة الله وبركاته..

   ... عشره في بير ...

هيا حكايه..
بس سخيفه..
كئيبه ورخمه..

بدايه..
ف لمه..
وصحبه..
وضحكه في خدمه..

ونهايه..
صرخه..
وفرقه..
ودمعه..

نفس الابطال..
نفس الإخراج..
نفس الأعلام..
نفس الجثامين..

خلصنا الخدمه..
لفينا ورجعنا..
سلاحنا ف ايدنا..
إيمان ف قلوبنا..

ربك بس العالم..
بألمنا..
واوجعنا..

عشر أبطال..
في مسلسل ماسخ..

تسعه  وحنا..

       كانوا صايمين..

الظابط احمد..
ودا قائد السريه..
وحش كاسر..
ومعلق نجمتين..

عم صابر..
صف ظابط..
حكمدار السريه..
قلبه طيب..
بس ف الخدمه..
ميعرفش ابوه..
شديد حبتين..

وتمن عساكر..
مطحونين..
أغلبهم من وجه قبلي..
الغلابه الطيبين..

السيد وحنا وابو القمصان..
دول م المراغه..
من سوهاج..

واحمد وغانم..
من أسيوط..
من بيت بدران..

وتيكا ومنص..
من وردان..

وماندو التوت..
من شربين..
سواق حريف..
معجون بمية عفاريت.
دمه خفيف..
بس كهين..

حنا لماندو..
بصوت عالي..
شد شويه يا ماندو..
المغرب قرب يدن..
            ياخي صايمين..

كل الصحبه..
بصوت عالي..
قاموا ضاحكين..

وف عز الضحكه..
بصوت عالي..
طلعوا الخاينين..

فجروا حلمي..
غدروا باخويا..
غدروا بصاحبي..
غدروا بابني..

  قتلوا الصايمين..

غني..
وعلى الصوت..
عيدك ف الجنه يا شهيد..
وسلم ع الشهدا اللي معاك..
وزود خطابات..
       التأبين..

اشجب..
واستنكر..
واشتم..
وارفع ايديك وادعي..
وانزل بدموع التعابين..

زود إعلام..
وزود توابيت..
ولف الجثامين..

لسه فيه أعلام..
           يا افندم..

طب وماله..
ماهو لسه..
فيه جثامين..
                جايين..

اكتب شهادة تقدير..
باسم الشهيد..
ومعاها رتبته..
ومعاها صورته..
يعلقوها..
    في قلب اوضته..
و يعيشوا معاها..
     مقهورين..

طب وبعدين..
تعالى قوللي..

كل يوم جثامين..
كل يوم شباب رايحين..
كل يوم تأبين..

مفيش..
مفيش إيه؟؟
مفيش فايده..

                خلينا ساكتين..

.... تحياتي

        النميرى نافع

.. رحم الله شهداء الوطن