اشتقت كتير ليكي... بقلم/ فهمي على

انا ياما اشتقت كتير ليكي
فبتيجي و اشوفك ف منامي
فتنامي ف حضني و ادفيكي
و احكيلك عن كل الامي
ما هو اصل البعد كتير قاسي
و انا بعدك شتت أفكاري
لو كنت باقول اني كويس
جوايا كتير اوي متداري
من غيرك طعم الكون زاعق
ف باعيش مع صمتي و اوجاعي
ارجع لحاجات كانت بيننا
و البعد ٠٠ و كان ايه الداعي
ف منامي باحسك فكراني
و بتقري كلامي اللي عشانك
باتمني ف يوم نرجع تاني
و اجيلك ٠٠٠ فاكر عنوانك
هو انتي ازاي عارفة تعيشي
و حياتك ماشية كما العادة
اشمعني انا قلبي بيسألني
و عتابه كتير اوي و زيادة
بيقول ازاي يعني تفارق
ما هي عارفة ان انت يدوب بيها
و ازاي البعد ماهوش فارق
وياها ٠٠ و عارفة تقضيها
استغنت ليه عن احلامكم
مش كنتو اتنين و الروح واحدة
دا الليل و نجومه اللي بتسهر
حاسين بالغربة و بالوحدة
انا اسف جدا لو يعني
بكلامي لمست حاجات فيكي
و ان قلبك ركز و سمعني
ما يقولش كلامي دا لعنيكي

فهمي على