بوسبولة محجوب يكتب .....

//////++++ حركتي مدادي ++++//////

مالك ياجارة في حالة

يالسايحة وغارقة ف تشعويد

مسكونة وعايشة روبالة

ماتعرفي ربي مزندة وقيد

حركتي مدادي يكتب عليك

وانت مراية كل محاني

اش طرى وجرى يالكافرة بك

يامخبية ف وهام سواني

سايحة في عالم الشعوادة

مامرتاحة يالفايتة لقياس

يالنازلة طالعة هوادة

بفعايلك مذوخة شلى ناس

مافيك رحمة مافيك شفقة

واكيفاش العالي يشوف فيك

نصابة معروفة حمقة

لالاحد ف الدنيا يداويك

غدرك باين لناس ظاهر

ولسعتي شلى ناس وناس

ماخفتي من داك القادر

ياسلالة الخناس الوسواس

عايشة مع الشيطان وولادو

ياللي ف حالك تالفة حايرة

ماتعرفي ربي من عبادو

وانتي في عالم الشرك سايرة

////+++ بقلم صقر الحروف الزجال بوسبولة المحجوب +++////