سكت الكلام .... بقلم الشاعر: السيد محمد صابر

سكت الكلااااام ....
==========
سكت الكلام
وسط الغيام
وسط  البكا
الكل شارد والدموع
بتحكى حكايات
رغم السكات
بتصرخ تقول
الدين حياة ...
للدم حرمة يا ناس ياهوووه
حكم الإله
أه الألام أه الوجع
مش أى أه
الكل فاكر إنه عايش ع الصراط
وإن الجنة داره ومنتهاه
كل اللى خالف فكره حتى ومذهبه
مش بس دينه
يبقى كافر بالإله
لابد أنه ينتهى
وتتسلب منه الحياة
لازم يموت
جهل وضلال
وفكر متفصل عشان
نعيش بخوف
والخوف منا أو علينا
أصبح خلاص
من غير كسوف
إسلوب حياة
ذكرى ميلاد المصطفى
عايزانة بس نفتكر
خلق النبى
فعله وكلامه لأمته
أزاى نعامل بعضنا
إزاى نعيش
مسلم بيعبد ربنا
مابيفتريش
الدين معاملة
دا كلام خير البشر
مقلش فجر وإنتحر
وقول جهاد
مقلش إرهب ليل  نهار
كل العباد
مقلش فجر فى الكنايس
وأقتل أخوك
إخوك وجارك فى الوطن
سندك وضهرك فى المحن
إيده بإيدك فى العبور
واقف معانا فى الطابور
شايل معانا همها
ماهو إبنها زيك تمام
والأرض أرضه
سكت الكلام ..
=====
السيد محمد صابر

م